Rev 19 | WSK | STEP | Mel imi menaram se ko udagi mu ani ngata nirung biya bo duruk wonong te tairam se ikiem, mu kariimet motam biya aikasan ale iwita balukasan: “Aleluya! Nanga Kaem nup patowanakko! Nu kota suwanta nanga giam, ale nu la nup biya, se nu la sokel ago!

Revelation of John 19

Babylon magaram se ko amilmil biya duruk wonong te kapakaso

1 Mel imi menaram se ko udagi mu ani ngata nirung biya bo duruk wonong te tairam se ikiem, mu kariimet motam biya aikasan ale iwita balukasan:

“Aleluya! Nanga Kaem nup patowanakko!
Nu kota suwanta nanga giam, ale nu la nup biya, se nu la sokel ago!
2 Nu kariimet diram la nunga tuteso ale ko koma nungarso.
Lage luan imet nup ago mu noko saman katagot te ali lilim la ko kariimet nunga maguwuram, se Kaem nu ikup yaman tuam.
Nu Kaem ko ura kariimet nunga moram se kueman, umutang ko, Kaem koma memek tuam.”
3 Nuna buta balukasan, ale akingtala aikasan balukasan:

“Aleluya!” makasan.
“Imet kaniwoso mu ko tama bur pempem la tarigi lagurukkowo,” makasan.
4 Se supuling 24, se mel marak anira 4, mu Kaem ko daiga kuwim biya mu koma dugu te dagulaman, ale nup patawukasan, ale balukasan:

“Aleluya! Mu nunguningta!” makasan.
5 Se daiga kuwim biya mu te kuring bo balukaso:

“Nina Kaem ko kariimet alo, noko nup patowaralko!
Nina biya te, gotek te noko nguangasan, mu nup patowaralko!”

Sipsip Gotek imet taukko se na biya kapurukko ko den

6 Se ani nirung bo ikiem, mu kariimet motam biya aikasan iwita, se yu biyala garap luan te kapawara iwita, se aking pure pagoso ale dung gururung maso wore iwitatala ikiem. Mu nuna iwita aikasan ale balukasan:

“Aleluya! Kari Biya nanga Kaem, Sokel Karogo, nu supuling biya bagoso ale mel suen la bitarso!
7 Umutang ko ana amilmilanak, ale ninguru amilmil tunak, ale nup biyala patowanakko!
Mu awuk, Sipsip Gotek imet taukko tom tai aratam,
se ko imet numi nungam ale bagoso. ^{▼▼Rev 19:7 Imet balso mu Kris kariimet nunga balso: Rev 21:2,9.}
8 Nu guang ningo nuam nunguningkiri, siraram, nikim biyala, mu tuman se naguram.”
Guang ningo mu Kaem ko kariimet munan ningo bitakasan wore ko kausa.

9 Se engel aninga maonam, “Den imi bataguruko: Arikaya Sipsip Gotek imet taukko mu ko na ami biya mu ko taimonko nunga aruman, mu amilmilomonko!” ^{▼▼Rev 19:9 Sipsip Gotek imet taukko ko na ami biya: Luke 14:15.} Aking nu balam, “Den imi Kaem ko den nunguning.”

10 Se ani engel doleng duap ningi dagulem, ale nup patawirikko negerem. Bare nu aninga maonam, “Suwuta me bitarko! Ani nika sikisaki arungu Jesus ko dugu duap balsan wore ninga turantala, ani Kaem ko ura kari. Kaem la nup patawurko! Kaem kuring tata ale bala mu iwita: Ana Jesus ko dugu duap balsan umutang mu prophet den nunguning.”

Kari horse siraram awete daigam

11 Se ani duruk wonong kuring kaigam se arigem, se horse bo kumik siraram mu arigem! Se ko kotam awete dagiwakaso mu ko nup “Kari Aora Giekkam, se Kari Nunguning.” Nu diram la kariimet nunga tuteso, ale diram la kager patawoso. 12 Noko motam mu tama kuamili iwita. Se ko supuling te mu crown suen biya. Se kumik te mu ko nup bo aniso, bare kariimet suen la nup mu me ko ikisan, nu kota ko ikiso. 13 Se ko guang maiya naguram mu gue biyala te anikaso. Se noko nup mu “Kaem ko Den”. ^{▼▼Rev 19:13 Ko guang naguram mu gue te anikaso: Isaiah 63:1-6. Ko nup mu “Kaem ko Den”: John 1:1, 14.}

14 Se duruk wonong ko kager motam suen biya mu guang ningo siraram nikim kapawara mu naguman, ale nunga horse nungumik siraram mu awete aragaman ale kowom karokasan. 15 Se nunga Kari Biya mu batir bo kore wuli kapawara, ali sor suen biya ko kariimet te nunga morukko, mu kuring te aratukaso. “Nu sikir ain iluwok ale kariimet te nunga bituokko.” ^{▼▼Rev 19:15 Psalm 2:9. Waen ko den: Isa 63:3; Jer 25:30.} Ale nu waen nunguning suwik te ita parasuwurokko, se umutang mu Kaem Sokel Karogo ko gomang magara wore ko balso. 16 Se noko guang se ko bugi duap te mu nup imi anikaso:

ALI SUPULING NUNGA SUPULING BIYA,
SE KARI BIBIYA NUNGA KARI BIYA

17 Se ani engel bo worem motam te sanamiwaram se arigem. Nu inanganang kualala bungia se animan mu biyala nunga auram ale balam, “Tairal ale Kaem ko na ami biya ewerete bolala awuralko! 18 Tairal ale ali supuling alo, se kager supuling, kager kari, horse, se nunga kotam kotam, wore nunga nungumik guang nalko, kariimet suen la, ura dungan se ura dungan mena, nunup ago se nunup mena, mu nunga nungumik guang nalko.” ^{▼▼Rev 19:17-18 Kaem ko na ami biya: Ezekiel 39:17-21.}

19 Se ani mel diwang mu se, ali sor supuling se nunga kager kari tai bolala awuman se nungarkem. Nuna Kari horse te daigam mu se ko kager kari arungak kagermonko taiman. ^{▼▼Rev 19:19 Nuna Jesus ilak kagermonko tai bolala awuman: Psalm 2:2; Rev 16:12-16.} 20 Bare nu mel diwang mu se prophet kawel nunga iluwam. Prophet kawel umutang ulengkala mel diwang sangukko kilek kawel duap duap bitakaso, ale te kariimet mel diwang ko kiwol taman ale ko kuar nup patawukasan mu nunga kulam. Se mel diwang mu se, prophet kawel mu ilak nunga iluman, ale marak animan la, mutim biya tama sulphur ago ningi kaniwoso mu ningi nunga warman. ^{▼▼Rev 19:20 Mel diwang se prophet kawel: Rev 13:11-17; 20:10.} Se Kari horse te daigam mu batir ko kuring te aratukaso mu te nononga kariimet suen biya nunga moram se kueman. Se inanganang suen la taiman ale nunga nungumik guang naman, naman, ale nutagu laga muruwuman.

21